O‘zbekiston doimiy sport bilan shug‘ullanuvchilar sonini 1 mln nafarga yetkazmoqchi

O‘zbekistonda yil yakuniga qadar sport bilan muntazam shug‘ullanuvchilar soni 1 mln nafarga yetkaziladi. Buning uchun yangi soliq imtiyozlari va rag‘batlantirish tizimi joriy etiladi.

Davlat rahbari huzurida o‘tgan yig‘ilishda barcha hududlarda «salomatlik balansi» tizimini joriy etish masalasi muhokama qilindi. Unga ko‘ra, har bir viloyatda namunaviy tumanlar tanlab olinib, u yerda mahalla raislari va ko‘ngillilar aholining jismoniy faolligini nazorat qilib boradi. Fuqarolarni sportga qiziqtirish uchun rag‘batlantirish tizimi yo‘lga qo‘yiladi. Har bir tumandagi eng yaxshi o‘nta mahalla bepul sport anjomlari bilan ta’minlanadi, aholisi sog‘lomlashgan mahalla raislari va ko‘ngillilar esa 15 million so‘mgacha mukofot puli olishi mumkin bo‘ladi.

Sohadagi mutaxassislar uchun ham yangi imtiyozlar ko‘zda tutilgan. Ommaviy sport murabbiylarining oylik maoshiga 200 foizgacha ustama beriladi, xususiy trenerlar uchun esa soliq stavkalari 1 foizgacha tushiriladi. Bu chora-tadbirlar turar joy massivlarida professional murabbiylar tarmog‘ini shakllantirishga yordam beradi. Shuningdek, 1-mayga qadar barcha ta’lim muassasalarida krossfit maydonchalari tashkil etilib, kelgusida ular umummilliy dasturga kiritiladi.

Davlat xizmatchilari uchun haftada bir marta «Sport kuni» o‘tkazilishi majburiy etib belgilandi. Tadbirkorlarga ham o‘z xodimlari uchun sport zallari qurish xarajatlarini foyda solig‘idan chegirib tashlash huquqi berildi. Ushbu qadamlar yil yakuniga qadar mamlakatda muntazam sport bilan shug‘ullanadiganlar sonini 1 million nafarga yetkazish uchun zarur infratuzilmani yaratishga xizmat qiladi.