170 dan ortiq o‘zbekistonlik ziyoratchi xususiy firmalar aybi bilan Makkada qolib ketdi. Ularning orasida og‘ir bemor keksalar borligi aytilmoqda.
O‘zbekistonlik bir guruh ziyoratchilar uchun umra safari kutilmagan sinovga aylandi. Makkadagi mehmonxonalarda qolib ketgan 170 dan ortiq fuqaro xususiy vositachilarning va’dalariga ishonib, endilikda vatanga qaytish yo‘lini topa olmayapti. Jiddadagi Bosh konsulxona xodimlari vaziyatni joyida o‘rganib, ziyoratchilarning ahvoli yuzasidan xavotir bildirdi.
Muammoning eng og‘ir jihati shundaki, guruh a’zolarining aksariyati yoshi ulug‘ insonlardir. Ular orasida qon bosimi va qandli diabetdan aziyat chekuvchilar, hatto yurak xurujini boshidan o‘tkazganlar bor. Safar muddati cho‘zilib ketishi oqibatida zaruriy tibbiy preparatlar tugab bormoqda. Diplomatlar vaziyatni o‘nglash choralarini ko‘rish bilan birga, imkoni borlarga aviabiletlarni o‘z hisobidan olib, tezroq qaytishni maslahat berishdi.
Hozirda diplomatik vakolatxona ushbu insonlarni qaytarish bo‘yicha rasmiy idoralar bilan aloqada bo‘lib turibdi. Fuqarolarga O‘zbekistonga qaytgach, ularni aldab, qiyin ahvolga solib qo‘ygan tadbirkorlar ustidan qonuniy tartibda chora ko‘rish huquqi borligi tushuntirildi. Masala to‘liq konsullik nazoratiga olingan.
Izohlar
Hozircha izohlar yo‘q