Toshkent va Samarqandda yer sotmoqchi bo‘lgan firibgarlar ushlandi. Zangiotada 24 sotix, Kattaqo‘rg‘onda esa temir yo‘l zonasidagi yerlar sotilishi to‘xtatib qolindi.
Bosh prokuratura huzuridagi Departament xodimlari tomonidan o‘tkazilgan tezkor tadbirlarda firibgarlar qo‘lga olindi. Ular kadastr tizimidagi “tanishlari” orqali davlat zaxirasidagi va temir yo‘l yaqinidagi yerlarni rasmiylashtirib berishni va’da qilgan.
O‘zbekistonning ikki hududida yer resurslarini talon-toroj qilish va firibgarlik yo‘li bilan sotish holatlariga chek qo‘yildi. Toshkent viloyatining Zangiota tumanida o‘tkazilgan tadbirda, “Bo‘ston” mahallasi hududidagi davlat zaxirasidan 24 sotix yerni rasmiylashtirib bermoqchi bo‘lgan shaxs ushlandi. Gumonlanuvchi kadastr xizmatidagi aloqalarini ishga solish evaziga xaridordan 20 ming dollar olayotgan vaqtida ashyoviy dalillar bilan qo‘lga olingan.
Shunga o‘xshash holat Samarqand viloyatining Kattaqo‘rg‘on tumanida ham qayd etildi. Mahalliy fuqaro 13 sotix yer maydonini 39 ming dollarga sotishga uringan. E’tiborlisi, ushbu yerning 5 sotixi temir yo‘lning muhofaza zonasida joylashgan bo‘lib, qonun bo‘yicha xususiy egalikka berilishi mumkin emas. Firibgar “tanishlari” yordamida hujjatlarni to‘g‘rilab berishini aytib, so‘ralgan mablag‘ning 5 ming dollarini bo‘nak (avans) sifatida olayotganida Departament xodimlari tomonidan to‘xtatildi.
Hozirda har ikkala holat yuzasidan O‘zbekiston Respublikasi Jinoyat kodeksining 168–moddasi (“Firibgarlik”) va 28, 211–moddalari (“Pora berishda sheriklik qilish”) bilan jinoyat ishlari qo‘zg‘atilgan. Tergov harakatlari davom etmoqda. Mutaxassislar fuqarolarni yer sotib olishda faqat rasmiy auksion savdolari va qonuniy tartib-taomillarga tayanishga, shubhali “vositachilar” xizmatidan voz kechishga chaqirmoqda.
Izohlar
Hozircha izohlar yo‘q