Termizda DXX xodimlari yirik narkoguruh faoliyatiga chek qo‘ydi. Guruh a’zolari orasida yoshi ulug‘ shaxslar borligi va ular bevosita kontrabanda bilan shug‘ullangani aniqlandi.
Davlax xavfsizlik xizmati Surxondaryo viloyati bo‘yicha boshqarmasi xodimlari tomonidan o‘tkazilgan tezkor tadbirda giyohvand moddalar savdosi bilan shug‘ullanuvchi jinoiy guruh fosh etildi. Ma’lum bo‘lishicha, chegara oldi hududlarida istiqomat qiluvchi bir necha nafar pensioner Afg‘onistondagi yetkazib beruvchilar bilan til biriktirgan. Ular afyun moddasini O‘zbekiston hududiga noqonuniy olib kirib, Termiz shahri va unga tutash tumanlarda sotishni yo‘lga qo‘yishgan.
Tezkor amaliyot davomida dastlab guruhning pensioner yoshidagi a’zolaridan biri ushlandi. Keyinchalik uning sheriklari ham qo‘lga olinib, ulardan ashyoviy dalil sifatida naqd pullar va 5 gramm giyohvandlik moddasi olindi. Guruh yetakchisining xonadonida o‘tkazilgan tintuv natijasida esa yirik hajmdagi narkotik zaxirasi aniqlangan: umumiy og‘irligi 12 kilogrammdan ortiq bo‘lgan 12 ta o‘ramdagi afyun hamda giyohvand moddalarni iste’mol qilish uchun mo‘ljallangan moslamalar musodara qilindi.
Hozirda mazkur holat yuzasidan jinoyat ishi qo‘zg‘atilib, barcha gumonlanuvchilar hibsga olingan. DXX tergov bo‘limi tomonidan surishtiruv ishlari davom ettirilmoqda.
Izohlar
Hozircha izohlar yo‘q