Toshkent Botanika bog‘ida velosiped va samokatlar taqiqlandi

Toshkent Botanika bog‘ida 1-apreldan velosiped va samokatlar haydash taqiqlandi. Ma’muriyat ushbu chorani piyodalar xavfsizligini ta’minlash bilan izohladi.

Poytaxtning eng yirik yashil hududlaridan biri — Botanika bog‘ida harakatlanish tartibi tubdan o‘zgardi. Bog‘ ma’muriyati hamda Ilmiy kengash qaroriga muvofiq, 2026-yil 1-apreldan boshlab hududda barcha turdagi velosiped va samokatlar (shu jumladan, elektr samokatlar) haydash rasman to‘xtatildi.

Rasmiy bayonotda keltirilishicha, so‘nggi vaqtlarda bog‘ ichida ikki g‘ildirakli transport vositalari ishtirokida to‘qnashuvlar va yiqilishlar natijasida tan jarohati olish holatlari ko‘paygan. Ko‘plab sayr qiluvchilarning shikoyat va so‘rovlari inobatga olinib, Botanika bog‘i o‘zining asl funksiyasi — sokin va xavfsiz ilmiy-madaniy dam olish maskani maqomini qaytarishga qaror qildi. Endilikda bog‘da faqat piyoda sayr qilishga ruxsat beriladi, bu esa tabiat qo‘ynida xotirjam dam olish muhitini yaratishga xizmat qiladi.