Apple Nvidia’dan o‘tib, dunyoning eng qimmat kompaniyasi maqomini qaytardi

Apple kompaniyasi bozor kapitallashuvi bo‘yicha Nvidia’dan o‘zib ketib, 5,03 trln dollar qiymat bilan dunyoning eng qimmat kompaniyasiga aylandi. Sun’iy intellekt xarajatlari fonida investorlar Apple’ni tanlamoqda.

Bozor yetakchisining almashinuvi va moliyaviy ko‘rsatkichlar

30-oktabr kuni Apple korporatsiyasi bozor kapitallashuvi bo‘yicha Nvidia’dan o‘zib ketib, dunyoning eng qimmat kompaniyasi maqomini qaytarib oldi.

Investorlarning sun’iy intellekt sohasiga yo‘naltirilayotgan ulkan xarajatlar va ularning o‘zini oqlashi borasidagi xavotirlari fonida iPhone ishlab chiqaruvchisi aksiyalari ishonchli investitsiya sifatida baholanmoqda. 30-oktabr kuni Apple aksiyalari 1,2 foizga arzonlashganiga qaramay, kompaniyaning umumiy bozor qiymati 5,03 trillion dollarni tashkil etdi. Nvidia aksiyalari esa 4,2 foizga pasayib, kompaniya kapitallashuvi 4,93 trillion dollargacha tushdi. Bu Apple’ning iyul oyi oxiridan beri ilk bor Nvidia’dan o‘zib ketishi bo‘ldi.

Bozordagi kayfiyatga Intel, Amazon, Alphabet va Meta kabi yirik texnologik gigantlarning choraklik moliyaviy hisobotlari investorlar kutganidan pastroq bo‘lgani ham ta’sir ko‘rsatdi.

Aksiyalarning rekord o‘sishi, iPhone Duo va yangi MacBook Pro taqdimoti

Avvalroq, 23-oktabr kuni Apple aksiyalari o‘z tarixidagi eng yuqori ko‘rsatkichni yangilab, 351,73 dollarga yetgan edi.Aksiyalar narxining o‘sishi kompaniyaning bahosi taxminan 2 ming dollar bo‘lgan ilk buklanuvchan smartfoni — iPhone Duo sotuvga chiqishi bilan bir vaqtga to‘g‘ri keldi.

Yangi qurilmaga talab yuqori bo‘lishiga qaramay, sotuv hajmi cheklangani sababli do‘konlar oldida turnaqator navbatlar kuzatilmadi. Apple har bir xaridorga ko‘pi bilan ikkita smartfon sotish tartibini belgiladi va faqat do‘konlarga shaxsan tashrif buyurganlarga xarid qilish imkonini berdi. Xitoy, Hindiston, Fransiya, Yaponiya va Gonkongda esa yangi gadjetni faqat internet orqali oldindan buyurtma bergan xaridorlar sotib olishi mumkin bo‘ldi.

Bundan tashqari, 28-oktabr kuni Apple sensorli ekranga ega ilk MacBook Pro noutbukini taqdim etdi. Qurilma OLED-displey, M5 Pro va M5 Max protsessorlari hamda Dynamic Island funksiyasi bilan jihozlangan.