Biznes-ombudsman reklama bannerlari, ekranlar va yoritgichlar uchun elektr energiyasining 3 baravar oshirilgan tarifini olib tashlashni taklif qildi.
Reklama va illyuminatsiya uchun ortiqcha to‘lovlarga chek qo‘yiladi
O‘zbekistonda biznes sub’yektlarining tijorat yoritgichlari hamda reklama vositalari uchun qiladigan ortiqcha xarajatlarini bekor qilish rejalashtirilmoqda. Biznes-ombudsman tashqi reklama va axborot ob’yektlarini elektr energiyasi bilan ta’minlashdagi amaldagi 3 baravar oshirilgan ustamani bekor qilish bo‘yicha Hukumat qarori loyihasini taqdim etdi.
Amaldagi tartibga ko‘ra, mediafasadlar, elektron displeylar, ko‘cha ekranlari va hatto binolarga ilingan oddiy girlyanda hamda illyuminatsiyalar uchun sarflangan elektr energiyasiga II guruh tarifi bo‘yicha 3 baravar oshirilgan narx qo‘llaniladi. Buning ustiga, tarmoq idoralari elektr sarfini ko‘pincha uskunaning kecha-kunduz to‘liq quvvatda ishlashidan kelib chiqib hisoblab kelgan.
Standart tariflarga o‘tish va tahlilchilar kutilmasi
Biznes-ombudsman tayyorlagan loyihaga ko‘ra, Elektr energiyasidan foydalanish qoidalaridagi ushbu ustama bandi butunlay o‘chirib tashlanadi. Taklif tasdiqlangan taqdirda, tadbirkorlar va reklama agentliklari svet uchun barcha qatori oddiy, standart tariflar bo‘yicha haq to‘lay boshlaydi.
Soha mutaxassislarining ta’kidlashicha, oshirilgan to‘lovning bekor qilinishi shahar infratuzilmasida tungi yoritgichlar va zamonaviy reklama vositalarining ko‘payishiga turtki beradi. Qaror loyihasi bo‘yicha bildiriladigan taklif va e’tirozlar 2026-yil 14-oktyabrga qadar qabul qilinadi.
