O‘zbekistonda o‘qituvchilar uchun qator yangi imtiyozlar va rag‘batlantirish choralari belgilandi. Milliy sertifikat egalariga 50 foiz ustama to‘lanadi hamda xorijiy stajirovkalar tashkil etiladi.
Ustama to‘lovlari, pul mukofotlari va xorijda stajirovka o‘tash imkoniyati
O‘zbekistonda pedagog xodimlarni moddiy hamda kasbiy jihatdan qo‘llab-quvvatlashga qaratilgan yangi imtiyozlar paketi e’lon qilindi. Unga ko‘ra, tegishli milliy sertifikatga ega bo‘lgan o‘qituvchilarning oylik maoshiga 50 foiz miqdorida ustama to‘lanishi yo‘lga qo‘yiladi.
Shuningdek, har yili respublikaning 208 ta tuman va shahridan ajralib chiqqan lider o‘qituvchilar 30 million so‘mdan bir martalik pul mukofoti bilan rag‘batlantiriladi.
O‘qituvchilarning malakasini oshirish va xalqaro tajribani ommalashtirish maqsadida yana 1 ming nafar pedagog Buyuk Britaniya, Fransiya va Singapur kabi rivojlangan davlatlarga xizmat stajirovkasiga yuboriladi. Bunda xorijiy va milliy sertifikatlarni qo‘lga kiritgan pedagoglarga imtihon topshirish xarajatlari to‘liq qoplab beriladi.
Pedagoglar farzandlariga imtiyozli kreditlar va olimpiada g‘oliblari ustozlariga toifalar
Yangi choralar pedagoglarning ijtimoiy himoyasini va unvon tizimini ham qamrab oladi. Xususan, ta’lim tizimida kamida 15 yillik ish stajiga ega bo‘lgan o‘qituvchilarning farzandlariga oliy ta’lim muassasalarida shartnoma (kontrakt) asosida o‘qishi uchun foizsiz ta’lim kreditlari ajratilishi belgilandi.
Olimpiada harakatini rivojlantirgan va iqtidorli yoshlarni tayyorlagan ustozlar uchun ham alohida yengilliklar yaratilmoqda. Xorazmiy, Farg‘oniy, Beruniy, Ibn Sino hamda Mendeleyev nomidagi xalqaro va mintaqaviy fan olimpiadalari g‘oliblarini tayyorlagan pedagoglarga to‘g‘ridan-to‘g‘ri oliy malaka toifasi beriladi.
