Soliq ilovasida cheklar orqali avtomobil yutish o‘yinining shartlari ma’lum qilindi

1-iyuldan boshlab Soliq ilovasida cheklar orqali avtomobil o‘ynaladi. Bojxona qo‘mitasi g‘oliblar har oyning 5-kunigacha aniqlanishini ma’lum qildi.

Qoraqalpog‘iston Respublikasi va Xorazm viloyatida joriy yilning 1-iyulidan boshlab oddiy xaridlar uchun berilgan fiskal cheklar orqali avtomobil yutib olish tizimi joriy etiladi. Davlat soliq xizmatining «Soliq» mobil ilovasida «Yutuqli o‘yinlar» deb nomlangan maxsus raqamli platforma ishga tushirilib, u inson omilisiz, mutlaqo avtomatlashtirilgan tarzda g‘oliblarni aniqlaydi.

Davlat bojxona qo‘mitasi taqdim etgan ma’lumotlarga ko‘ra, omadli ishtirokchilar har oy yakunlangach, keyingi oyning 5-sanasiga qadar elektron tizim tomonidan tanlab olinadi.

Aksiya doirasida bosh sovrin bo‘lgan yengil avtomobillardan tashqari boshqa turdagi qimmatbaho sovg‘alar ham o‘ynaladi. Idoraning tushuntirishicha, mazkur yangi mexanizm hududlarda fiskal intizomni mustahkamlash, savdodagi hisob-kitoblarning shaffofligini ta’minlash hamda tadbirkorlar o‘rtasida onlayn nazorat-kassa texnikasidan foydalanish madaniyatini oshirish maqsadida joriy etilmoqda.