Raqobat va reklama qoidabuzarliklari haqida xabar bergan shaxslarga BHMning 100 baravarigacha pul mukofoti to‘lash tartibi loyihasi muhokama qilinmoqda.
Mazkur tartibni belgilovchi maxsus nizom loyihasi jamoatchilik muhokamasiga taqdim etildi. Unga ko‘ra, pul mukofotlari Raqobatni rivojlantirish va iste’molchilar huquqlarini himoya qilish qo‘mitasi qoshidagi jamg‘armaga qonunbuzarlardan undirilgan jarima summasining ma’lum bir qismi hisobidan qoplanadi.
Taklif etilayotgan tartibga binoan, raqobatga zid yashirin kelishuvlar hamda kartellar haqida xabar bergan shaxslarga undirilgan mablag‘ning 3 foizi miqdorida (ammo bazaviy hisoblash miqdorining 100 baravari ya’ni 41,2 million so‘mdan oshmagan hajmda) mukofot beriladi.
Reklama qoidalarining buzilishi bo‘yicha esa jarima summasining 10 foizi miqdorida (ammo BHMning 10 baravari ya’ni 4 million 120 ming so‘mdan ko‘p bo‘lmagan miqdorda) rag‘batlantirish ko‘zda tutilgan.
Mas’ullarning qayd etishicha, og‘zaki til biriktirishlarni aniqlash murakkab bo‘lgani bois, ushbu amaliyot jamoatchilik nazoratini kuchaytirishga va reklamalarda milliy qadriyatlarga zid obrazlar ishlatilishining oldini olishga xizmat qiladi.
Eslatib o‘tamiz, mamlakatda 2026-yilning 1-avgustidan boshlab yadro va sanoat xavfsizligi qoidabuzarliklari hamda narkotik moddalarning noqonuniy aylanmasi haqida xabar bergan fuqarolarni ham pul mukofoti bilan taqdirlash tizimi ishga tushadi.
Izohlar
Hozircha izohlar yo‘q