Xorazmda mast holda 120 km/soat tezlikda avariya sodir etib, yo‘lovchining o‘limiga sababchi bo‘lgan profilaktika inspektori 4 yilga ozodlikdan mahrum etildi.
Aniqlanishicha, Urganch shahar IIB huquqbuzarliklar profilaktikasi bo‘limining 1996-yilda tug‘ilgan kichik inspektori D.Y. xizmat vaqtidan tashqari paytda spirtli ichimlik iste’mol qilgan. Shundan so‘ng u mast bo‘lishiga qaramay va atrofdagilarning ogohlantirishlariga e’tibor bermasdan, o‘zining Cobalt rusumli avtomashinasida tanishini uyiga olib borish uchun rulga o‘tirgan.
Guvohlarning so‘zlariga ko‘ra, haydovchi ichki yo‘lda soatiga taxminan 120 kilometr yuqori tezlikda harakatlangan. Yo‘l qismidagi notekisliklar va chuqurliklar sababli u boshqaruvni yo‘qotgan, oqibatda avtomobil yo‘l chetidagi beton to‘siqqa urilib, ag‘darilib ketgan. Mashina salonida bo‘lgan yo‘lovchi X. olgan og‘ir tan jarohatlari tufayli shifoxonada hayotdan ko‘z yumgan. Sud majlisida ayblanuvchi qilmishidan qattiq pushaymonligini bildirib, marhum do‘stining yaqinlaridan uzr so‘ragan. Sud sudlanuvchini Jinoyat kodeksining 266-moddasi 2-qismi bilan aybdor deb topib, unga 4 yil muddatga ozodlikdan mahrum qilish jazosini tayinladi. Shuningdek, u 3 yilgacha transport vositalarini boshqarish huquqidan chetlashtirildi.
