Prezident maktablariga yangi o‘quv yili uchun hujjatlar qabuli 25-maydan boshlanadi

Prezident maktablariga 2026/2027-o‘quv yili uchun onlayn hujjat topshirish 25-maydan 14-iyungacha davom etadi. Maktablarga 5-sinf o‘quvchilari qabul qilinadi.

Ixtisoslashtirilgan ta’lim muassasalari agentligi xabariga ko‘ra, qabul jarayonlari joriy yilning 25-mayidan 14-iyuniga qadar faqat onlayn shaklda amalga oshiriladi.

Ota-onalar va arizachilar hujjatlarni Yagona interaktiv davlat xizmatlari portali (my.gov.uz) hamda ariza.piima.uz rasmiy sayti orqali elektron tarzda topshirishlari mumkin. Belgilangan tartibga ko‘ra, Prezident maktablariga joriy yilda 4-sinfni muvaffaqiyatli tugatgan o‘quvchilar 5-sinfda o‘qishni davom ettirish uchun qabul qilinadi.

Kirish imtihonlari va kerakli hujjatlar ro‘yxati bo‘yicha qo‘shimcha ma’lumotlar qabul boshlangunga qadar rasmiy kanallarda e’lon qilinishi kutilmoqda. Mazkur ta’lim muassasalariga qabul shaffoflik va iqtidorli yoshlarni saralab olish tamoyillari asosida o‘tkaziladi.