O‘zbekistonda quyosh panellari uchun to‘lovlar keskin kamaytirilishi mumkin. O‘z ehtiyoji uchun quyosh panellari o‘rnatgan tadbirkorlar ishlab chiqarilgan ortiqcha elektr energiyasini davlatga sotish tarifining pasayishidan xavotir bildirmoqda.
Muhokama qilinayotgan taklifga ko‘ra, ortiqcha elektr energiyasini sotib olish narxi 1 kVt⋅soat uchun 800 so‘mdan 250 so‘mgacha tushirilishi mumkin. Bu esa amaldagi tarifdan uch barobardan ko‘proq pasayishni anglatadi.
Masala O‘zbekiston Liberal-demokratik partiyasi vakillari va tadbirkorlar uchrashuvi davomida ko‘tarilgan. Tadbirkorlardan biri korxonasida 350 kVt quvvatli quyosh panellari o‘rnatilgani va loyihani yana kengaytirish rejalashtirilganini ma’lum qilgan.
Uning so‘zlariga ko‘ra, hozirgi tizim ortiqcha elektr energiyasini davlatga 800 so‘mdan sotish imkonini bergan. Endilikda esa tarifni 250 so‘mgacha tushirish masalasi muhokama qilinmoqda.
Tadbirkorlar bunday qaror loyihalarning o‘zini oqlash muddatiga jiddiy ta’sir qilishi mumkinligini ta’kidlamoqda. Ular elektr energiyasini yuqori tarifda sotib olayotgani, ammo ortiqcha hajmni juda past narxda sotishga majbur bo‘lishini adolatsiz deb hisoblamoqda.
Qonunchilik palatasi vakillari masala bo‘yicha profil qo‘mitalar ish boshlaganini ma’lum qildi. Deputatlar yangi tarifning iqtisodiy asoslarini va uning biznesga ta’sirini o‘rganishni rejalashtirmoqda.
Shuningdek, tadbirkorlar elektr energiyasi uchun to‘lovlarning kechiktirilayotgani va byurokratik muammolar yuzasidan ham e’tiroz bildirgan.
Avvalroq prezident qaroriga ko‘ra, davlat quvvati 1 MVtgacha bo‘lgan quyosh, shamol va biogaz stansiyalaridan ortiqcha elektr energiyasini kamida 10 yil davomida maxsus formula asosida sotib olishi belgilangan edi.
Keyinchalik Iqtisodiyot va moliya vazirligi ushbu xarid normasini iste’molchilarning ikkinchi guruhi tarifining 80 foizidan 70 foizigacha kamaytirishni taklif qilgan.
