10-may kuni Toshkentda kuchli yomg‘ir oqibatida 23 ta manzilda suv to‘plandi. Maxsus xizmatlar oqibatlarni bir soatda bartaraf etdi va tizimni yangilashga kirishdi.
Shahar hokimligi va FVV ma’lumotiga ko‘ra, 8 ta tumanidagi 23 ta nuqtada suv to‘planishi holatlari kuzatilgan, eng ko‘p murojaat Mirzo Ulug‘bek va Shayxontohur tumanlaridan kelib tushgan.
Suv toshqinlariga nafaqat yog‘ingarchilik miqdori, balki ariqlarning chiqindilar bilan to‘lib qolgani hamda irrigatsiya tarmoqlarining o‘zboshimchalik bilan to‘sib qo‘yilgani sabab bo‘lgan. Vaziyatni bartaraf etish uchun 60 dan ortiq maxsus texnika safarbar etilib, bir soat ichida suv oqimlari to‘liq bartaraf etildi. Mutaxassislar hozirda tizimning o‘tkazuvchanlik quvvatini oshirish ustida ishlamoqda.
Kelgusida bunday holatlarning oldini olish maqsadida 5 ta manzilda yangi irrigatsiya tarmoqlari quriladi, ayrim joylarda esa diametri 800 mm bo‘lgan quvurlar yotqiziladi. Shuningdek, qo‘shimcha nasos agregatlari va suv qabul qilish panjaralarini o‘rnatish orqali drenaj tizimini bosqichma-bosqich modernizatsiya qilish ko‘zda tutilgan. Bosh rejaga ko‘ra, shahar infratuzilmasi sutkasiga 36 mm yog‘ingarchilikni qabul qila oladigan darajaga yetkaziladi.
