2026-2027 o‘quv yilidan tarbiyachilar uchun ishdan ajralmagan holda bakalavrda o‘qish yo‘lga qo‘yiladi. Ishga qabulda oliy ma’lumotli mutaxassislarga ustunlik beriladi.
2026-2027 o‘quv yilidan boshlab maktabgacha ta’lim xodimlari uchun bakalavriatda o‘qishning yangi tartibi amal qila boshlaydi. Tarbiyachilar ish faoliyatini to‘xtatmagan holda to‘lov-kontrakt asosida oliy ma’lumot olish imkoniyatiga ega bo‘ladilar. O‘quv rejasi haftasiga bir kun oliy o‘quv yurtida dars o‘tish va besh kun bog‘chada ishlash formatida tashkil etiladi.
Shuningdek, yangi bog‘chalarga xodimlarni jalb qilish bo‘yicha talablar ham kuchaytirildi. Endilikda bo‘sh ish o‘rinlari uchun oliy ma’lumotga ega bo‘lgan nomzodlarga birinchi navbatda ustunlik beriladi. Mazkur qoida tizimda faoliyat yuritayotgan kadrlarning malakasini oshirish va ta’lim sifatini yangi bosqichga olib chiqishga xizmat qiladi.
Ishdan ajralmagan holda o‘qish tizimi tarbiyachilarga o‘z ish joyini yo‘qotmasdan professional darajasini yuksaltirish imkonini beradi. Bu yangilik, ayniqsa, hududlardagi bog‘chalarni malakali mutaxassislar bilan ta’minlash va bolalarga beriladigan ta’lim mazmunini yaxshilashda muhim ahamiyat kasb etishi kutilmoqda.
