O‘zbekistonliklar mart oyida go‘sht, sut va energiya resurslari narxi oshganini ko‘proq his qilishdi. Aholi tomonidan sezilgan inflyatsiya darajasi 11,1 foizni tashkil etdi. Toshkent shahri inflyatsiya sezilishi bo‘yicha yetakchi hudud bo‘lib qolmoqda.
3200 dan ortiq respondent ishtirok etgan so‘rovda fuqarolar asosan oziq-ovqat mahsulotlaridan go‘sht va sut, energetika sohasida elektr hamda tabiiy gaz, shuningdek, yonilg‘i-moylash materiallari narxi sezilarli darajada ko‘tarilganini qayd etishgan. Dorivor vositalar va transport xizmatlari ham narxi oshgan asosiy yo‘nalishlar qatoridan joy oldi.
Hududlar kesimida narxlar o‘sishi eng yuqori darajada Toshkent shahrida (13,3 foiz), eng past ko‘rsatkich esa Namangan viloyatida (10 foiz) sezilgan.
Shuningdek, aholining daromad darajasi ham inflyatsiyani idrok etishga ta’sir ko‘rsatgan: oyiga 2 mln so‘mdan 4 mln so‘mgacha daromadga ega bo‘lganlar narxlar 9,9 foizga oshganini qayd etgan bo‘lsa, 30 mln so‘mdan ko‘p topadiganlar uchun inflyatsiya darajasi 16,4 foizdan yuqori bo‘lib tuyulgan. Bu farq turli daromad guruhlarining iste’mol savatchasi tarkibi turliligi bilan izohlanadi.
