Afg‘onistondagi zilzila O‘zbekistonda sezildi. 18-aprel kuni ertalab qo‘shni davlat hududida sodir bo‘lgan yer silkinishi respublikaning bir qator viloyatlarida ham qayd etildi.
Seysmoprognostik monitoring markazi ma’lumotiga ko‘ra, zilzila soat 07:54 atrofida ro‘y bergan. Yer silkinishining magnitudasi 5,5 ga teng bo‘lib, o‘choq taxminan 150 kilometr chuqurlikda joylashgan.
Epitsentr Afg‘onistonning Badaxshon hududida, Toshkentdan qariyb 537 kilometr janubi-sharq tomonda joylashgan.
Mutaxassislar qayd etishicha, O‘zbekiston hududida zilzila kuchi past darajada sezilgan. Eng sezilarli tebranishlar Surxondaryo viloyatida kuzatilib, 2–3 ballni tashkil etgan.
Qolgan hududlar — Farg‘ona, Jizzax, Samarqand, Sirdaryo, Qashqadaryo, Andijon, Namangan viloyatlari hamda Toshkent viloyati va poytaxtda esa zilzila taxminan 2 ball atrofida sezilgan.
Hozircha zilzila oqibatida vayronagarchiliklar yoki jabrlanganlar haqida ma’lumotlar yo‘q.
Izohlar
Hozircha izohlar yo‘q