Yangi qonun loyihasiga ko‘ra, maktab bitiruvchilari uchun yagona davlat imtihoni joriy etiladi. Imtihon natijalari ham attestat berish, ham OTMga kirish uchun asos bo‘lib xizmat qiladi.
O‘zbekiston ta’lim tizimida maktabni tamomlash va oliy o‘quv yurtlariga kirish sinovlarini yagona formatga o‘tkazish bo‘yicha farmon loyihasi e’lon qilindi. Mazkur islohot bitiruvchilarga o‘z bilimlarini bir marta topshirilgan imtihon orqali tasdiqlash va shu natija bilan oliygohlarga hujjat topshirish imkonini beradi. Bu tizim ortiqcha imtihon yuklamasini kamaytirib, qabul jarayonining shaffofligini ta’minlashga qaratilgan.
Yangi tartibga binoan, 11-sinf bitiruvchilari ona tili va matematika fanlaridan majburiy ravishda, yana ikkita mutaxassislik fanidan esa ixtiyoriy ravishda imtihon topshiradilar. Loyihada O‘zbekiston tarixi fanining majburiy fanlar blokidan chiqarilishi alohida qayd etilgan. Tizimning tajriba-sinov bosqichi 2026-yildan Navoiy, Farg‘ona, Toshkent viloyatlari va Qoraqalpog‘istonda boshlanadi, 2027-yildan esa butun respublika ushbu tartibga o‘tadi. Milliy yoki xalqaro sertifikati bor o‘quvchilarga tegishli fan bo‘yicha maksimal ball berish tartibi saqlab qolinmoqda.
Izohlar
Hozircha izohlar yo‘q