20-apreldan boshlab oliy malaka toifasiga ega o‘qituvchilar uy-joy subsidiyasi uchun ariza topshirishlari mumkin. Davlat boshlang‘ich badalning 25 foizini qoplab beradi.
Joriy yilning 20-aprel kuni soat 14:00 dan boshlab oliy malaka toifasiga ega (bosh o‘qituvchi lavozimidagi) pedagoglardan ipoteka subsidiyasi uchun arizalar qabul qilinadi. Hukumat qaroriga muvofiq, mazkur dastur doirasida uy-joy krediti bo‘yicha boshlang‘ich badalning 25 foizi davlat tomonidan qoplab berilishi ko‘zda tutilgan. Bu imkoniyatdan foydalanish uchun o‘qituvchilar belgilangan ijtimoiy mezonlarga javob berishlari lozim.
Subsidiyaga da’vogarlik qilayotgan ustozlar kamida 15 yillik pedagogik stajga ega bo‘lishlari va oliy toifa (yoki bosh o‘qituvchi) maqomida ishlashlari shart. Yana bir muhim shart shundan iboratki, ariza beruvchi yoki uning turmush o‘rtog‘i nomida respublika bo‘ylab ikki va undan ortiq uy-joy bo‘lmasligi kerak. Arizalarni my.gov.uz portali, MyGov mobil ilovasi yoki bevosita Davlat xizmatlari markazlari orqali yuborish mumkin.
Izohlar
Hozircha izohlar yo‘q