Sho‘rchi tumanida Rossiya armiyasi safiga qo‘shilib, Kursk viloyatidagi jharbiy operatsiyada ishtirok etgan shaxsga jazo tayinlandi. Frontda yaralanib uyiga qaytgan fuqaro yollanma askarlikda aybdor deb topildi.
Jinoyat ishlari bo‘yicha Sho‘rchi tuman sudi yollanma askarlikda ayblangan Yu. A.ga nisbatan hukm chiqardi. Aniqlanishicha, 2024-yilda Rossiyaga taksichilik qilish uchun ketgan erkak bir yildan so‘ng ushbu mamlakat qurolli kuchlari bilan shartnoma imzolagan. Tayyorgarlikdan o‘tgach, u Kursk viloyatidagi jangovar harakatlar zonasiga yuborilgan va bevosita to‘qnashuvlarda qatnashgan.
Janglar davomida snaryad portlashi natijasida jarohatlangan Yu. A. Moskva viloyatidagi gospitalda davolangan va shundan so‘ng urushni davom ettirishdan bosh tortgan. O‘zbekiston elchixonasi yordamida uyiga qaytgan shaxsga nisbatan jinoyat ishi qo‘zg‘atildi. Sud uni yollanma askarlik va chet davlat harbiy xizmatiga kirish moddalari bo‘yicha aybdor deb topib, 3 yilu 6 oy muddatga ozodlikni cheklash jazosini tayinladi.
