2027/2028-o‘quv yilidan oliy ta’lim muassasalariga magistraturaga qabulda mutaxassislik fanlaridan mustaqil ravishda imtihon o‘tkazish vakolati berilishi mumkin.
O‘zbekiston oliy ta’lim tizimida magistratura bosqichiga qabul qilish jarayonlarida jiddiy islohotlar amalga oshirilishi kutilmoqda. Rejaga ko‘ra, o‘quv yilidan boshlab oliy ta’lim tashkilotlariga talabgorlarni tanlab olishda mutaxassislik fanlaridan imtihon shaklini mustaqil belgilash vakolati berilishi ko‘zda tutilgan.
Amaldagi tartibga muvofiq, hozirda magistraturaga kirish uchun alohida imtihonlar o‘tkazilmaydi. Talabgorlar bakalavr diplomi bo‘yicha o‘rtacha ball hamda xorijiy tilni bilish darajasini tasdiqlovchi sertifikat asosida o‘qishga qabul qilinadi. Mutaxassislik bo‘yicha bilimlar darajasi qabul jarayonida bevosita sinovdan o‘tkazilmaydi.
Yangi tartib joriy etilsa, har bir universitet yoki institut o‘z yo‘nalishlaridan kelib chiqib, imtihon o‘tkazish yoki o‘tkazmaslik masalasini o‘zi hal qiladi. Shu bilan birga, imtihon shaklini tanlashda ham erkinlik beriladi — bu og‘zaki suhbat, yozma ish yoki test sinovlari bo‘lishi mumkin.
Ushbu o‘zgarishlar magistratura bosqichida ta’lim sifatini oshirish va sohaga chinakam salohiyatli kadrni jalb qilishga xizmat qilishi kutilmoqda. Akademik mustaqillik doirasida joriy etilayotgan bu yangilik oliy ta’lim muassasalariga o‘z talablariga mos keladigan nomzodlarni saralab olish imkonini beradi.
