Farg‘ona viloyati va So‘x tumanini bog‘laydigan eng qisqa magistral yo‘l loyihasi 11-aprelda e’lon qilindi. Avtomobil yo‘llari qo‘mitasi O‘zbekiston tumani orqali o‘tadigan yangi trassani barpo etish bo‘yicha qo‘shni davlatlar bilan muzokaralar boshlashini ma’lum qildi.
Prezident rahbarligida o‘tgan yig‘ilishda So‘x tumanini ijtimoiy-iqtisodiy rivojlantirish bo‘yicha yangi vazifalar belgilandi. Avtomobil yo‘llari qo‘mitasi raisi Jamshid Tursunovning ta’kidlashicha, tumanni viloyat markazi bilan bog‘laydigan eng qisqa va qulay yo‘nalishda yangi avtomobil yo‘li quriladi. Mazkur trassa O‘zbekiston tumani orqali o‘tishi rejalashtirilgan bo‘lib, hozirda mutaxassislar joyiga chiqqan holda o‘rganish ishlarini olib bormoqda.
Shuningdek, tumandagi 500 kilometrga yaqin ichki va mahalliy yo‘llarni to‘liq tartibga keltirish rejalashtirilgan. Tursunovning so‘zlariga ko‘ra, loyihani amalga oshirishda qo‘shni davlatlar bilan hamkorlik masalalari ko‘rib chiqiladi. Muzokaralar natijasiga ko‘ra yaqin vaqt ichida aniq texnik yechimlar asosida qurilish ishlariga start berilishi kutilmoqda.
So‘x tumani O‘zbekistonning eksklavi sifatida to‘liq Qirg‘iziston hududi bilan o‘ralgan. Yangi yo‘l qurilishi tuman aholisi uchun transport qatnovini yengillashtirish va hududning iqtisodiy integratsiyasini kuchaytirishda strategik ahamiyatga ega bo‘ladi.
