O‘zbekiston prezidenti Shavkat Mirziyoyev 10-aprel kuni Buxoro viloyatiga tashrif buyurdi. Davlat rahbari hudud rivoji bilan tanishadi hamda Qozog‘iston prezidenti bilan strategik hamkorlik, sanoat kooperatsiyasi va suv-ekologiya masalalari yuzasidan muzokaralar o‘tkazadi.
Prezident Shavkat Mirziyoyevning Buxoroga tashrifi hududni ijtimoiy-iqtisodiy rivojlantirish loyihalarini ko‘zdan kechirishdan boshlandi. Davlat rahbari viloyatdagi yangi sanoat quvvatlari faoliyati va aholi farovonligini oshirishga qaratilgan istiqbolli rejalar bilan tanishadi.
Tashrifning asosiy voqeasi ertaga, 11-aprel kuni Buxoroda bo‘lib o‘tadigan oliy darajadagi uchrashuvdir. Qozog‘iston prezidenti Qosim-Jo‘mart To‘qayevning amaliy tashrifi doirasida ikki mamlakat o‘rtasidagi ittifoqchilik aloqalarini chuqurlashtirish masalalari muhokama qilinadi. Muzokaralarda transport, energetika va o‘zaro savdo aylanmasini kengaytirishga alohida e’tibor qaratiladi.
Shuningdek, davlat rahbarlari mintaqaviy xavfsizlik va transchegaraviy suv resurslaridan samarali foydalanish borasida fikr almashadilar. Dasturga ko‘ra, prezidentlar Buxorodagi tarixiy yodgorliklarni ziyorat qiladilar hamda viloyatning eksport salohiyatiga bag‘ishlangan ko‘rgazma bilan tanishadilar.
Izohlar
Hozircha izohlar yo‘q