Afg‘onistondan kelgan yuk mashinasidagi afg‘on qozonlari ichiga salkam 200 kg gashish yashirilgani aniqlandi.
Surxondaryo viloyatidagi chegarada xo‘jalik buyumlari niqobi ostida olib o‘tilayotgan juda ko‘p miqdordagi narkotik partiyasi to‘xtatib qolindi. “Termiz avtoyo‘l” nazorat-o‘tkazish maskanida Afg‘onistondan kirib kelgan yuk avtomobili tekshirilganda, uning ichida yashirin yuk borligi ma’lum bo‘ldi.
DXX xodimlari denovlik haydovchi boshqaruvidagi mashina yukxonasida bo‘lgan 750 ta afg‘on qozonini ko‘zdan kechirishdi. Ma’lum bo‘lishicha, qozonlarning 210 tasi maxsus tayyorlangan bo‘lib, ularning ichiga jami 190,8 kg gashish moddasi joylashtirilgan. Mazkur yuk Markaziy Osiyodagi davlatlardan biriga tranzit sifatida yo‘llangan.
35 yoshli haydovchi ushbu reydga qadar maxsus xizmatlar nazoratida bo‘lgan. Hozirda ushbu jinoiy sxema ishtirokchilarini aniqlash va qonuniy chora ko‘rish bo‘yicha tergov harakatlari davom ettirilmoqda.
