Amir Temur tavalludining 690 yilligida Shavkat Mirziyoyev yangilangan Temuriylar muzeyini ko‘zdan kechirdi. Muzey zallari sun’iy intellekt va aqlli texnologiyalar bilan jihozlanib, yangi noyob ashyolar bilan boyitildi.
Sohibqiron Amir Temur tavalludining 690 yillik sanasida O‘zbekiston prezidenti Temuriylar tarixi davlat muzeyidagi keng ko‘lamli o‘zgarishlar bilan tanishdi. Muassasa binoni rekonstruksiya qilishdan tashqari, dunyoning eng nufuzli muzeylari standartlariga mos ravishda to‘liq raqamli transformatsiyadan o‘tkazildi.
Muzeyning ko‘rgazmalar zali mutlaqo yangicha yondashuv asosida shakllantirilgan. Xususan, ikkinchi qavatda sun’iy intellekt va smart-texnologiyalar yordamida o‘sha davr muhitini tiklovchi interaktiv zonalar ish boshladi. Birinchi qavatdagi bo‘lim esa Sohibqironning Ikkinchi Renessans poydevorini yaratishdagi o‘rniga bag‘ishlangan. Shuningdek, xorijiy kolleksiyalardan sotib olingan noyob osori-atiqalar muzey fondini yanada boyitdi.
Tashrif chog‘ida Shavkat Mirziyoyev yangilangan muzey endilikda zamon talablariga to‘liq javob berishini e’tirof etdi. Davlat rahbarining so‘zlariga ko‘ra, ushbu maskan yoshlar va chet ellik mehmonlar uchun tariximizni o‘rganishda muhim maydon bo‘lib xizmat qilishi kerak. Prezident muzeyning faxriy mehmonlar kitobida o‘z dil so‘zlarini yozib qoldirdi.
