Toshkent metrosida Amir Temur tavalludiga bag‘ishlangan poyezd harakati yo‘lga qo‘yiladi

Toshkent metrosining Chilonzor yo‘nalishida Amir Temur tavalludiga bag‘ishlangan tematik poyezd ish boshlaydi. Bekatlarda bayram tadbirlari o‘tkaziladi.

Poytaxt metropoliteni matbuot xizmatining xabar berishicha, 9-apreldan boshlab metroning Chilonzor yo‘nalishida Sohibqiron Amir Temur yubileyiga bag‘ishlangan tematik poyezd o‘z ishini boshlaydi. Mazkur tashabbus buyuk davlat arbobi tavalludining qariyb yetti asrlik to‘yi tantanalari doirasida amalga oshirilmoqda. Poyezd vagonlari Amir Temur hayoti va faoliyatini aks ettiruvchi maxsus dizayn asosida bezatilgan.

Bayram tadbirlari munosabati bilan poyezd harakati jadvaliga vaqtincha o‘zgartirish kiritiladi. Xususan, ushbu tarkib «Amir Temur xiyoboni» bekatida odatdagidan bir daqiqa ko‘proq to‘xtab turadi. Qo‘shimcha vaqt bekatda tashkil etiladigan tantanali marosimlar va yo‘lovchilar uchun bayram aksiyalarini o‘tkazish maqsadida ajratilgan. Metropoliten rahbariyati barcha yo‘lovchilarni ushbu tarixiy sana munosabati bilan tashkil etilgan tadbirlarda ishtirok etishga chorlamoqda.