Yangiyo‘lning «Lazzat» mahallasida S.B. korxonasi 121 tup daraxtni noqonuniy yo‘q qildi. Tabiatga 1 mlrd so‘mdan ortiq zarar yetkazilgani aniqlandi.
Ekoinspeksiya va Ekopolitsiya xodimlari Yangiyo‘l shahrining «Lazzat» mahallasida o‘tkazgan reyd davomida o‘simlik dunyosiga jiddiy zarar yetkazish holatini aniqladi. Ma’lum bo‘lishicha, S.B. mas’uliyati cheklangan jamiyati xodimlari hududdagi 121 tup daraxtni noqonuniy ravishda kesib, ularni maxsus texnikalar yordamida ildizi bilan qazib olgan.
Ekologiya, atrof-muhitni muhofaza qilish va iqlim o‘zgarishi vazirligi mutaxassislari ushbu holat bo‘yicha o‘simlik dunyosiga yetkazilgan zararni 1 mlrd 67 mln 574 ming so‘m miqdorida baholadi. Hozirda noqonuniy xatti-harakatlar bo‘yicha barcha hujjatlar huquqiy baho berish va aybdorlarni javobgarlikka tortish uchun Toshkent viloyati prokuraturasiga topshirildi. Shahar hududida yashil maydonlarni qonunga xilof ravishda yo‘q qilish holatlari qat’iy nazoratda ekani bildirildi.
