Senat IIV qo‘riqlash xodimlarining vakolatlarini kengaytirdi. Endi ular jamoat joyida chekish, daraxt kesish va noqonuniy ov uchun jarima qo‘llashlari mumkin.
Oliy Majlis Senati ichki ishlar organlarining qo‘riqlash faoliyati va jamoat xavfsizligini ta’minlash borasidagi mas’uliyatini oshirishga qaratilgan qonunni ko‘rib chiqdi. Hujjatga muvofiq, IIV Qo‘riqlash departamenti xodimlariga muayyan turdagi ma’muriy huquqbuzarliklarni ko‘rib chiqish va jazo choralarini qo‘llash vakolati berilmoqda. Xususan, xodimlar jamoat joylarida tamaki mahsulotlarini iste’mol qilish, daraxt va butalarni qonunga xilof ravishda kesish yoki shikastlash, shuningdek, noqonuniy ov qilish kabi holatlarga nisbatan bevosita bayonnoma rasmiylashtirish huquqiga ega bo‘ladilar.
Qonun bilan qo‘riqlash tizimlariga xizmat ko‘rsatish sohasidagi tadbirkorlik faoliyatini tartibga solishda ham o‘zgarishlar kiritilmoqda. IIV qo‘riqlash vositalarini loyihalash va ularga texnik xizmat ko‘rsatish bo‘yicha ruxsatnomalar berish vakolatini qo‘lga kiritmoqda. Tadbirkorlik subyektlari uchun esa ayrim tartib-taomillar bo‘yicha xabardor qilish tartibi joriy etilmoqda. Senatorlarning ta’kidlashicha, ushbu chora-tadbirlar huquqbuzarliklar profilaktikasini kuchaytirish hamda atrof-muhitni muhofaza qilishda huquq-tartibot idoralarining tezkorligini oshirishga xizmat qiladi.
