Shohrux Davlatov 42 km masofaga yugurishda Toshkent marafoni g‘olibi bo‘ldi. Musobaqada 50 ta davlatdan 15 mingdan ortiq kishi qatnashdi.
Bugun, 5-aprel kuni Toshkent shahri markaziy ko‘chalari «International Tashkent Marathon – 2026» xalqaro sport bayramining markaziga aylandi. «Humo Arena» majmuasi oldida start olgan musobaqada dunyoning 50 dan ortiq mamlakatidan kelgan professional va havaskor sportchilar qatnashdi. Tashkilotchilarning ma’lum qilishicha, joriy yilgi marafon ishtirokchilar soni bo‘yicha rekord o‘rnatib, sog‘lom turmush tarzini targ‘ib qilishda muhim bosqich bo‘ldi.
Kunning eng kutilgan voqeasi — 42 kilometr 195 metrli klassik marafon masofasida o‘zbekistonlik Shohrux Davlatov marraga birinchi bo‘lib yetib keldi va oltin medalni qo‘lga kiritdi. Kuchli uchlikdan, shuningdek, yana bir hamyurtimiz Andrey Petrov (kumush) hamda belaruslik Vladislav Pryamov (bronza) joy oldi. Marafon dasturi nafaqat asosiy poygani, balki 21 km, 10 km va 5 km masofalarga yugurish, shuningdek, skandinavcha yurish va inklyuziv toifadagi startlarni ham o‘z ichiga oldi.
Toshkent marafoni yildan-yilga o‘z nufuzini oshirib, xalqaro taqvimdagi muhim tadbirlardan biriga aylanmoqda. Bu yilgi musobaqa doirasida bolalar uchun maxsus yugurish yo‘lakchalari va ommaviy sport festivallari ham tashkil etildi. G‘oliblarni taqdirlash marosimida qayd etilganidek, bunday yutuqlar mamlakatda ommaviy sportni rivojlantirish va professional atletlarni xalqaro arenalarga tayyorlashda katta turtki bo‘ladi.
