O‘zbekistonda Xalq qabulxonalari tizimi yangilanmoqda. Hokimlar va vazirlar aholi muammolarini hal qilish uchun shaxsan javob beradi va hisobot topshiradi.
O‘zbekiston prezidentining yangi farmoniga binoan, davlat organlari rahbarlarining aholi bilan muloqot qilish tizimi tubdan o‘zgarmoqda. Hujjatga ko‘ra, Qoraqalpog‘iston Vazirlar Kengashi raisi, viloyatlar, Toshkent shahri hamda tuman va shahar hokimlari Xalq qabulxonalari ishini jamoatchilik asosida muvofiqlashtirib boradi. Bu chora hokimiyatning xalq bilan to‘g‘ridan-to‘g‘ri muloqotini kuchaytirish va muammolarni joyida hal etishga qaratilgan.
Islohotning muhim jihati shundaki, vazirlar va hududiy rahbarlar endi faqat murojaatlarni ko‘rib chiqish bilan cheklanib qolmay, tizimli muammolar bo‘yicha shaxsan davlat rahbariga hisobot beradi. Chiqish va sayyor qabullar jarayoni to‘liq raqamlashtiriladi, bu esa har bir murojaatning ijrosini real vaqt rejimida nazorat qilish imkonini beradi.
Bundan tashqari, jamoaviy murojaatlarni ko‘rib chiqishda mahalla vakillari ishtirok etishi shart etib belgilandi. Eng asosiysi, murojaatni nazoratdan chiqarish faqat ariza beruvchining roziligi bilan amalga oshiriladi. Ushbu yangi mexanizm davlat idoralari faoliyatida ochiqlikni ta’minlash va byurokratiyani kamaytirish yo‘lidagi navbatdagi qadam bo‘lishi kutilmoqda.
Izohlar
Hozircha izohlar yo‘q