Olmazor tumanida voyaga yetmagan qizga nisbatan zo‘ravonlik sodir etgan shaxsga nisbatan tekshiruv boshlandi. Qizga shar’iy nikohdan so‘ng tan jarohati yetkazilgan va zo‘rlangan.
Olmazor tumanidagi dahshatli holat
Toshkent shahrining Olmazor tumanida voyaga yetmagan qizga nisbatan tazyiq va jinsiy zo‘ravonlik holati aniqlandi. Bu haqda Ijtimoiy himoya milliy agentligining Toshkent shahar boshqarmasi ma’lum qildi.
Aniqlanishicha, fuqaro Ch.B. 2025-yil 28-avgust kuni voyaga yetmagan N.M. bilan shar’iy nikohdan o‘tib, birga yashab kelgan. Dastlabki ma’lumotlarga ko‘ra, Ch.B. qizga nisbatan muntazam ravishda zo‘rlik ishlatib, jinsiy ehtiyojlarini qondirgan hamda unga tan jarohatlari yetkazgan.
Tergov va qizni himoya qilish choralari
Hozirda mazkur holat yuzasidan Olmazor tuman IIB tomonidan tergovga qadar tekshiruv ishlari olib borilmoqda. 5-oktyabr kuni Olmazor tuman “Inson” ijtimoiy xizmatlar markazi hamda IIB xodimlari voyaga yetmagan N.M. va uning ammasi N.N. bilan atroflicha suhbat o‘tkazdi.
Qizning huquq va qonuniy manfaatlarini himoya qilish, xavfsizligini ta’minlash hamda ruhiy holatini barqarorlashtirish bo‘yicha zarur choralar ko‘rilmoqda. Kelgusida har qanday tazyiq va zo‘ravonlikning oldini olish maqsadida jabrlanuvchiga rasman himoya orderi berildi.
