Toshkentda pullik avtoturargohlar tizimi ko‘plab fuqarolar shikoyatlaridan so‘ng qayta ko‘rib chiqilishi rejalashtirilmoqda.
Toshkent shahar hokimi o‘rinbosari Abdurahmon Baxtiyev poytaxtda shaxsiy avtomobildan foydalanish nega qimmatlashayotgani va yangi tenderlar qanday qilib tizimni zamonaviy urbanistika standartlariga moslashtirishga xizmat qilishini tushuntirdi.
Toshkent hokimiyatida ommaviy axborot vositalari uchun uchrashuv o‘tkazilib, unda so‘nggi paytlarda eng ko‘p muhokama qilinayotgan mavzulardan biri — yo‘l bo‘yidagi pullik avtoturargohlar tarmog‘ini kengaytirish masalasi muhokama qilindi. Hokim o‘rinbosari Abdurahmon Baxtiyev tarif siyosati va auksionlar shaffofligi yuzasidan shahar ma’muriyatining pozitsiyasini izohladi.
Baxtiyevning so‘zlariga ko‘ra, pullik avtoturargohlar haydovchilar uchun ma’lum bir “signal” vazifasini bajaradi. Uning ta’kidlashicha, poytaxtda avtomobilni saqlash va foydalanish xarajatlarining nisbatan arzonligi tirbandliklarni kuchaytirmoqda. Shu sabab shahar ma’muriyati shaxsiy avtomobilda harakatlanishni jamoat transportidan qimmatroq qilishni maqsad qilgan.
Yangi tizimga ko‘ra, avval rejalashtirilganidek bitta yirik lot o‘rniga 100–200 ta alohida lokatsiya auksionga qo‘yiladi. Bu operatorlar o‘rtasida raqobatni oshirish va jarayonni yanada shaffof qilishga xizmat qiladi.
Fuqarolar shikoyatlaridan so‘ng ayrim joylarda, xususan shifoxonalar atrofida (jumladan Gematologiya instituti yaqinida) pullik avtoturargoh tashkil etish masalasi qayta ko‘rib chiqilmoqda. Shahar hokimiyati bunday obyektlarning har birini alohida o‘rganib chiqishni va’da qilgan.
Shuningdek, avtoturargoh narxlarini oshirish jamoat transportini rivojlantirish bilan parallel ravishda amalga oshirilmoqda. Shahar uchun yangi avtobuslar xarid qilinmoqda va qo‘shimcha yo‘nalishlar ishga tushirilmoqda.
86 ta ko‘chada avtoturargoh operatorini tanlash jarayoni ham uzoq vaqt davomida murakkab bo‘lib kelgan. Dastlab g‘olib bo‘lgan Balcomuz MChJ obodonlashtirish bo‘yicha majburiyatlarni bajara olmagach, qayta auksion o‘tkazildi. Natijada boshqaruv huquqini yiliga 62,9 milliard so‘m taklif qilgan Streetpark Systems MChJ qo‘lga kiritdi. Bu summa avvalgi ishtirokchi taklif qilgan mablag‘dan qariyb ikki baravar kam.
Uchrashuv davomida pullik avtoturargohlar uchun to‘lovni amalga oshirmagan haydovchilarga nisbatan aniq javobgarlik mexanizmlari qonunchilikda yetarli darajada belgilanmagani ham qayd etildi. Hozirda tizimni huquqiy jihatdan mustahkamlash va qoidabuzarlarga nisbatan javobgarlik choralarini aniq belgilash ustida ish olib borilmoqda.
Izohlar
Hozircha izohlar yo‘q