Toshkentning Sergeli tumanida o‘z bolasini yetaklab, tartibga solinmagan o‘tish joyidan o‘tayotgan ayolning bir necha santimetr yonidan katta tezlikda yo‘lovchi avtobusi uchib o‘tdi.
«Toshshahartransxizmat» ma’lumotiga ko‘ra, 30-mart kuni 104-sonli yo‘nalish haydovchisi (59 yoshli shaxs) piyodalarga yo‘l bermay, o‘lim xavfini yuzaga keltirgan.
Ushbu qaltis vaziyatdan so‘ng haydovchi bilan mehnat shartnomasi darhol bekor qilindi, ma’muriy bayonnoma rasmiylashtirildi. Ammo tahlillar shuni ko‘rsatmoqdaki, haydovchini jazolash — bu shunchaki oqibat bilan kurashishdir.
Toshkentning ko‘p polosali va serqatnov magistrallarida tartibga solinmagan «zebra»lar hamon hayot-mamot lotereyasi bo‘lib qolmoqda. Bitta qatordagi mashina to‘xtaganida, bo‘sh qolgan qatordan kimdir «sakrab» chiqmasligiga hech qanday kafolat yo‘q.
Ushbu voqea poytaxtda piyoda eng himoyasiz qatlam ekanligini yana bir bor isbotladi. Videoda ayolning ham hushyorlikni yo‘qotib, transportga qaramay harakatlangani ko‘rinadi, biroq bu shahar infratuzilmasidagi kamchiliklarni oqlamaydi. Amalda poytaxtdagi «zebra» — xavfsizlik hududi emas, balki haydovchilar tomonidan tez-tez e’tiborsiz qoldiriladigan tavsiyaviy chiziqdir. Shu bois, piyodalarga o‘z hayotlarini saqlab qolish uchun faqat va faqat shaxsiy ehtiyotkorlikka tayanishdan o‘zga chora qolmayapti.
