Beshinchi Toshkent xalqaro investitsiya forumi yakunlariga ko‘ra, umumiy qiymati 43,2 milliard dollarga teng 166 ta kelishuv imzolandi. Loyihalar orasida yangi aeroport qurilishi ham bor.
Forum doirasida bir qator yirik va strategik megahujjatlar imzolandi. Xususan, Saudiyaning Vision Invest kompaniyasi bilan davlat-xususiy sheriklik asosida 2,8 milliard dollar evaziga Toshkent yangi xalqaro aeroportini qurish bo‘yicha kelishuvga erishildi.
Shuningdek, Vyetnamning Rox Group kompaniyasi New Bukhara City va New Central Bukhara loyihalari doirasida Buxoroda premium-klassdagi turar joylar, mehmonxonalar, biznes markazlar, shifoxona va maktablar barpo etish uchun 2 milliard dollar sarmoya kiritadigan bo‘ldi.
Qo‘shni Qozog‘iston kompaniyalari ham yirik loyihalarni e’lon qildi: KMG PetroChem 780 million dollar evaziga polietilentereftalat va tereftal kislotasi ishlab chiqarish zavodini yo‘lga qo‘ysa, PTC Holding Yangiyo‘l tumanida 300 million dollarlik «A» toifasidagi ko‘p funksiyali logistika markazini quradi.
AQSHning Cove Capital kompaniyasi esa 200 million dollar yo‘naltirgan holda «Sariqul» va «Taskazgan» konlarini o‘zlashtirish hamda foydali qazilmalarni qayta ishlash loyihalarida ishtirok etishi rasmiylashtirildi.
Izohlar
Hozircha izohlar yo‘q