Markaziy bank va NAPP steyblkoinlarni chiqarish va ulardan foydalanish tartibini tasdiqladi. Mamlakatda anonim va algoritmik tokenlar taqiqlanadi, steyblkoinlar esa to‘liq pul mablag‘lari bilan ta’minlanishi shart.
O‘zbekiston moliyaviy texnologiyalar bozorida yangi davr boshlanmoqda: Markaziy bank hamda Istiqbolli loyihalar milliy agentligi (NAPP) steyblkoinlar muomalasi uchun maxsus huquqiy rejim — «qumloqxona» (sandbox) joriy etish haqidagi nizomni tasdiqladi. Ushbu tashabbus to‘lov tizimlarini rivojlantirish va xalqaro hisob-kitoblarda innovatsion yechimlarni qo‘llashga qaratilgan. Yangi qoidalarga ko‘ra, milliy yoki xorijiy valyuta bilan ta’minlangan tokenlar ichki bozorda to‘lov vositasi sifatida ishlatilishi mumkin.
Shu bilan birga, tartibga soluvchi organlar kriptobozordagi xavf-xatarlarni cheklash bo‘yicha keskin choralar ko‘rmoqda. Xususan, O‘zbekistonda algoritmik va anonim tokenlar, shuningdek, boshqa kriptovalyutalar bilan ta’minlangan aktivlar faoliyati taqiqlanadi. Steyblkoin chiqarmoqchi bo‘lgan kompaniyalar o‘z aktivlarining 100 foiz miqdoridagi mablag‘ni Markaziy bankdagi alohida hisobda saqlashlari shart. Ishtirokchilar zimmasiga axborot xavfsizligi va kiberhimoya bo‘yicha eng yuqori talablarga rioya qilish majburiyati yuklanadi.
