Prezident Shavkat Mirziyoyev soha vakillari bilan o‘tkazilgan muloqotda tadbirkorlarning texnika importi bilan bog‘liq muammolarini tingladi.
Xususan, Lux City Houses korxonasi rahbari Vohidjon Mirzayev mamlakatda ishlab chiqarilmaydigan texnikalarni olib kirishda utilizatsiya yig‘imi va bojxona to‘lovlari yukini kamaytirish qurilish tannarxiga ijobiy ta’sir ko‘rsatishini ta’kidladi. Davlat rahbari ushbu taklifni ma’qullab, mutasaddi idoralarga tegishli qaror loyihasini tayyorlashni topshirdi.
Prezidentning ko‘rsatmasiga ko‘ra, yaqin orada mahalliy ishlab chiqarishda mavjud bo‘lmagan texnikalar ro‘yxati shakllantiriladi va ularga nisbatan bojlar pasaytiriladi yoki butunlay bekor qilinadi.
Qurilish va uy-joy kommunal xo‘jaligi vaziri Sherzod Hidoyatovning qayd etishicha, sohadagi texnikalarning aksariyati ma’nan eskirgan va 2017-yilda berilgan imtiyozli davrdan so‘ng parkni yangilash ehtiyoji yuzaga kelgan.
Yangi tartib tadbirkorlarga Shaffof qurilish tizimida yuqori ball olish va davlat obektlari qurilishida zamonaviy texnologiyalar bilan faolroq ishtirok etish imkonini beradi.
