O‘zbekistonda Adliya vazirligi huzurida To‘lovga qobiliyatsizlik ishlari agentligi tuzildi. Yangi organ moliyaviy ahvoli og‘ir tadbirkorlarni sog‘lomlashtirish bilan shug‘ullanadi.
Prezidentning 6-maydagi farmoni bilan mamlakatimizda yangi davlat organi — To‘lovga qobiliyatsizlik ishlari agentligi va uning hududiy bo‘limlari faoliyati yo‘lga qo‘yiladigan bo‘ldi. Adliya vazirligi huzurida ochilayotgan ushbu muassasa to‘lovga qobiliyatsizlik sohasida yagona davlat siyosatini yurituvchi maxsus vakolatli organ hisoblanadi.
Agentlik zimmasiga sohani tartibga solish, davlat organlari faoliyatini muvofiqlashtirish hamda jarayonlarni to‘liq raqamlashtirish orqali ortiqcha qog‘ozbozlikka barham berish kabi muhim vazifalar yuklandi.
Mazkur agentlikni tashkil etish zarurati aprel oyida Shavkat Mirziyoyevga taqdim etilgan yangi yondashuvlar doirasida belgilangan edi. O‘shanda amaldagi tizim korxonalarni saqlab qolish o‘rniga ko‘proq ularni tugatishga qaratilgani tanqid ostiga olingandi.
Raqamlarga ko‘ra moliyaviy ahvoli og‘irlashgan 93 mingta tadbirkorning faqatgina kichik bir qismiga nisbatan to‘lovga qobiliyatsizlik jarayonlari qo‘llanilgan xolos. Endilikda yangi tashkil etilgan agentlik xalqaro tajriba asosida samarali sanatsiya mexanizmlarini joriy etish orqali qiyin ahvoldagi biznes sub’ektlarini qayta tiklashga yordam berishi ko‘zda tutilgan.
