Hukumat qarori bilan jismoniy shaxslarning mol-mulk va yer soliqlari bo‘yicha imtiyozlardan foydalanishi uchun elektron murojaat yuborish tartibi belgilandi. Arizalar 2 ish kunida ko‘rib chiqiladi.
Adliya vazirligi matbuot xizmatining xabar berishicha, hukumatning joriy yil 16-iyuldagi 389-sonli qarori bilan Vazirlar Mahkamasining 2022-yil 2-apreldagi 150-sonli qaroriga tegishli qo‘shimchalar kiritildi. Mazkur hujjat bilan jismoniy shaxslarga ushbu soliq turlari bo‘yicha imtiyozlar taqdim etishga doir davlat xizmatini ko‘rsatishning ma’muriy reglamenti tasdiqlandi.
Yangi tartibga ko‘ra, fuqarolar soliq imtiyozlaridan foydalanish uchun masofadan turib, elektron soliq xizmatlari portali yoki Yagona interaktiv davlat xizmatlari portali (my.gov.uz) orqali elektron murojaat yuborishlari mumkin.
Kelib tushgan arizalar va ma’lumotlar soliq organining mas’ul xodimi tomonidan 2 ish kuni ichida mavjud idoralararo elektron bazalar asosida o‘rganib chiqiladi. Shundan so‘ng imtiyozni qo‘llash yoki uni rad etish to‘g‘risida yakuniy xulosa rasmiylashtiriladi hamda 1 ish kuni davomida fuqaroning shaxsiy kabinetiga yuboriladi. Murojaat rad etilgan taqdirda, fuqaro ko‘rsatilgan kamchiliklarni bartaraf etib, qayta murojaat qilish huquqiga ega bo‘ladi.
