O‘zbekiston Prezidenti Shavkat Mirziyoyev yangi kimyo ishlab chiqarishlarini ishga tushirish muddatlarini tanqid qildi va tarmoqdagi investitsiya loyihalarini jadallashtirishni topshirdi. Bu haqda Prezident matbuot xizmati xabar berdi.
11-mart kuni davlat rahbari kimyo sanoatini rivojlantirish masalalariga bag‘ishlangan yig‘ilish o‘tkazdi. Unda ayrim loyihalar bo‘yicha ishlar belgilangan muddatlardan ortda qolayotgani keskin tanqid qilindi. Prezident asosiy talab sifatida “maqsad – harakat – natija” tizimini joriy etish zarurligini ta’kidladi.
Davlat rahbari Qo‘ng‘irot soda zavodi, “Samarqandkimyo” va Dehqonobod kaliy zavodi kabi korxonalarda yangi quvvatlarni ishga tushirish hamda kengaytirish jarayonlarida kechikishlar bo‘lishi mumkin emasligini qayd etdi. Mas’ul rahbarlarga investorlar bilan birgalikda ishlarni tezkor yakunlash vazifasi yuklatildi.
Kimyo sanoati mamlakat ichki bozorini azot, fosfor va kaliy o‘g‘itlari bilan yetarli hajmda ta’minlashi kerak. Joriy yil uchun kimyo mahsulotlari eksporti hajmi 720 million dollar darajasida belgilangan.
Hisob palatasiga energiya sarfini optimallashtirish, xomashyo xarajatlarini kamaytirish va ishlab chiqarish jarayonlarini chuqur raqamlashtirish orqali mahsulot tannarxini 10–15 foizga pasaytirish bo‘yicha topshiriq berildi.
Modernizatsiya jarayonida “O‘zkimyosanoat” 16 ta axborot tizimini yagona platformaga birlashtirdi. Ushbu platforma 21 ta davlat idorasining ma’lumotlar bazalari bilan integratsiya qilingan. Yaqin vaqt ichida tarmoqqa moliyaviy holatni tahlil qilish va o‘g‘itlarga bo‘lgan talabni prognoz qilish uchun sun’iy intellekt texnologiyalarini joriy etish rejalashtirilmoqda.
Ilm-fanga ham alohida e’tibor qaratildi. Janubiy Koreya hamkorlari bilan birgalikda innovatsion kimyo-texnologiya markazini tashkil etish boshlanadi. Mazkur institut Markaziy Osiyoda yagona bo‘lib, zamonaviy katalizatorlar, sorbentlar va nanomateriallar ishlab chiqish bilan shug‘ullanadi.
Umumiy qiymati 9,5 milliard dollarga teng bo‘lgan 133 ta loyihaning amalga oshirilishi qat’iy nazorat ostida bo‘ladi. Chunki yangi ishlab chiqarish quvvatlarini o‘z vaqtida ishga tushirish mamlakat iqtisodiyoti uchun muhim ahamiyatga ega.
