O‘zbekiston Markaziy banki Samarqanddagi 46-Butunjahon shaxmat olimpiadasi munosabati bilan oltin va kumush esdalik tangalarini chiqardi. Tangalar dizayni, adadi va sotuv shartlari.
Badiiy konsepsiya va dizayn xususiyatlari
O‘zbekiston Respublikasi Markaziy banki Samarqand shahrida o‘tkaziladigan 46-Butunjahon shaxmat olimpiadasiga bag‘ishlangan oltin hamda kumush esdalik tangalarini muomalaga chiqarishini e’lon qildi. Tangalar dizayni Ikki tanga — bir Registon konsepsiyasi asosida yaratilgan bo‘lib, ularni yonma-yon joylashtirganda Registon maydoni fasadining yaxlit tasviri hosil bo‘ladi. Tangalarning old tomonida (aversida) Tillakori madrasasining me’moriy elementlari shaxmat figuralari va geometrik naqshlar bilan uyg‘unlashgan. Oltin tanga aversida o‘zbek tilida, kumush tangada esa ingliz tilida mos yozuvlar tushirilgan. Tangalarning orqa tomonida (reversida) Xalqaro shaxmat federatsiyasi FIDE logotipi, Markaziy bank nomi va nominal qiymati aks ettirilgan.
Texnik ko‘rsatkichlar va sotish tartibi
Esdalik tangalari 999,9 soflikdagi oltin va kumush metallaridan zarb etilgan. Har bir tanganing og‘irligi 31,1 grammni, nominal qiymati esa 100 ming so‘mni tashkil etadi. Dastlabki bosqichda 100 dona oltin hamda 500 dona kumush tanga chiqarilishi rejalashtirilgan bo‘lib, bozordagi talab hamda kolleksionerlar qiziqishidan kelib chiqib adad bosqichma-bosqich oshirilishi mumkin. Xaridorlar esdalik tangalarini tijorat banklari filiallari orqali alohida yoki ikki tangadan iborat to‘plam shaklida xarid qilishlari mumkin.
