Prezident qaroriga muvofiq, 1-noyabrdan boshlab reklama xabarlari faqat fuqarolarning roziligi bilan yuboriladi. Soat 18:00 dan 09:00 gacha reklama qo‘ng‘iroqlari va xabarlarini tarqatish butunlay taqiqlanadi.
Ushbu tartibni nazarda tutuvchi qaror prezident Shavkat Mirziyoyev tomonidan imzolandi. Yangi qoidalar mobil aloqa orqali xizmat va mahsulotlarni targ‘ib qilishga qat’iy cheklovlar o‘rnatadi va aholini keraksiz spam-xabarlardan himoya qilishga qaratilgan.
Hujjatga ko‘ra, abonentning aniq va tasdiqlangan roziligisiz amalga oshiriladigan har qanday reklama jo‘natmalari qonunga xilof deb hisoblanadi. Shuningdek, kechki va tungi vaqtlarda, ya’ni soat 18:00 dan 09:00 gacha har qanday reklama qo‘ng‘iroqlari va xabarlarini tarqatish taqiqlanadi.
Mobil aloqa operatorlari zimmasiga esa abonentning talabiga binoan ular tomonidan tarqatilayotgan reklama qo‘ng‘iroqlari va xabarlarini to‘liq yoki qisman bloklash majburiyati yuklanadi.
Belgilangan talablarga rioya qilmaslik reklama to‘g‘risidagi hamda shaxsga doir ma’lumotlar to‘g‘risidagi qonunchilikni buzish deb e’tirof etiladi va qonunbuzarlarga nisbatan tegishli choralar ko‘rilishiga sabab bo‘ladi.
