Adliya vazirligi suhbat savollarini bir oy oldin saytga joylashni majburiy qildi. 1-iyuldan davlat xizmatiga qabul qilishning yangi tartibi joriy etiladi.
O‘zbekistonda yoshlarni davlat fuqarolik xizmatiga qabul qilishda yagona va shaffof yondashuvni ta’minlashga qaratilgan yangi qoidalar amalga kiritilmoqda. Adliya vazirligining xabar berishicha, ushbu tartib joriy yilning 1-iyulidan boshlab kuchga kiradi va tanlov bosqichlarini sezilarli darajada osonlashtiradi.
Yangi tartibga muvofiq, davlat organlari suhbat jarayonlarini yashirin o‘tkaza olmaydi. Nomzodlarga og‘zaki imtihon paytida beriladigan barcha savollar suhbat o‘tkazilishidan kamida bir oy oldin o‘sha davlat tashkilotining rasmiy veb-saytida e’lon qilinishi shart. Bir oy oldin saytga joylashtirilmagan va jamoatchilikka oshkor qilinmagan savollarni nomzodlardan so‘rash qat’iyan taqiqlanadi.
Shuningdek, yosh mutaxassislarni ishga joylashtirishdagi sun’iy to‘siqlar olib tashlanadi. Maxsus ro‘yxat shakllantirilib, undagi lavozimlarga qabul qilishda ichki tumanlararo tanlovlar o‘tkazilmaydi hamda nomzodlardan umumiy yoki mutaxassislik bo‘yicha ish staji talab etilmaydi. Boshqa qator lavozimlar uchun esa talab qilinadigan maksimal mehnat staji ko‘pi bilan ikki yil etib belgilanadi.
