Mamlakatda birinchi pullik avtomagistral loyihasini amalga oshirish boshlandi. Yangi tezkor magistral Urganch va Xiva shaharlarini bog‘laydi hamda Xorazm viloyati ma’muriy markazi bilan hududning turistik markazi o‘rtasidagi yo‘l vaqtini sezilarli qisqartiradi.
Hozirgi kunda shaharlar orasidagi masofa 30 kilometrdan ortiq. Avtobusda safar taxminan bir soat, shaxsiy transportda esa 35–40 daqiqa davom etadi. Yangi magistral foydalanishga topshirilgach, yo‘lni taxminan 15 daqiqada bosib o‘tish mumkin bo‘ladi.
Loyiha uzunligi 35 km bo‘lgan, to‘rt polosali zamonaviy avtomagistral qurilishini nazarda tutadi. Hisobiy harakat tezligi soatiga 150 km gacha etadi. Investitsiya hajmi qariyb 120 mln AQSh dollariga baholanmoqda. Qurilish ishlari ilg‘or muhandislik yechimlari va raqamli trafik nazorati tizimlari asosida olib borilmoqda.
Harakat xavfsizligi va o‘tkazuvchanlikni oshirish maqsadida intellektual boshqaruv texnologiyalarini joriy etish rejalashtirilgan.
Xorazm viloyatining iqlim xususiyatlari inobatga olinib, yo‘l qoplamasining yuqori harorat va ob-havo o‘zgarishlariga chidamliligiga alohida e’tibor qaratilgan. Yer osti suvlari sathi yaqin joylashgani sababli loyiha doirasida drenaj tizimlari va maxsus kollektorlar ko‘zda tutilgan.
Magistral infratuzilmasi 17 ta muhandislik inshootini — ko‘priklar, yo‘l o‘tkazgichlar va hayvonlar uchun o‘tish yo‘laklarini o‘z ichiga oladi. Bu atrof-muhitga ta’sirni kamaytirishga xizmat qiladi. Kirish joylarida avtomatlashtirilgan to‘lov punktlari o‘rnatiladi.
Loyihaning asosiy maqsadi — Urganch xalqaro aeroportidan tarixiy Xivaga tezkor transferni ta’minlash va hududning turistik jozibadorligini oshirishdir. Yo‘l ishga tushirilishi biznes, mehmonxona sohasi va xizmatlar sektoriga qo‘shimcha turtki berishi kutilmoqda.
Qurilishni joriy yilning avgust oyiga qadar yakunlash rejalashtirilgan.
