2025-yilgi IQAir hisoboti: Dunyoning 143 ta davlatidan faqat 13 tasida havo xavfsiz deb topildi. Eng iflos havo Pokiston va Tojikistonda qayd etilgan.
Yer yuzida nafas olish uchun xavfsiz hududlar tobora kamayib bormoqda. Shveysariyaning havo sifatini monitoring qiluvchi IQAir kompaniyasi tomonidan e’lon qilingan yangi hisobotga ko‘ra, o‘rganilgan 143 ta mamlakat va hududdan faqat 13 tasida havo ifloslanish darajasi me’yor doirasida ekani ma’lum bo‘ldi.
Jahon sog‘liqni saqlash tashkiloti (JSST) inson salomatligi uchun eng xavfli hisoblangan PM2,5 (mayda chang zarrachalari) miqdori bir kub metr havoda 5 mikrogrammdan oshmasligi kerakligini ta’kidlaydi. Ushbu zarrachalar o‘pka va qon aylanish tizimiga chuqur kirib borib, yurak-qon tomir, nafas yo‘llari kasalliklari hamda saraton xavfini keskin oshiradi.
Tadqiqot natijalariga ko‘ra, faqatgina Andorra, Estoniya, Islandiya, Avstraliya, Barbados, Bermuda orollari, Fransuz Polineziyasi, Grenada, Yangi Kaledoniya, Panama, Puerto-Riko, Reyunon va AQSH Virgin orollari JSST talablariga javob bergan. Qolgan 130 ta davlatda havo ifloslanishi xavfli darajada qolmoqda.
Dunyodagi eng iflos havoga ega davlatlar reytingida Pokiston (67,3 mkg/m³), Bangladesh (66,1 mkg/m³) va Markaziy Osiyo mintaqasidan Tojikiston (57,3 mkg/m³) yetakchilik qilmoqda. Shuningdek, Chad va Kongo DR ham eng yomon ko‘rsatkich qayd etgan beshtalikka kirgan.
