Adliya vazirligi kriptoaktivlar provayderlari uchun yangi cheklovlarni ro‘yxatdan o‘tkazdi. Endi rahbarlarni almashtirish va ulushlarni sotish oldindan kelishiladi.
Adliya vazirligi tomonidan Kriptoaktivlar aylanmasi sohasidagi xizmatlar provayderlari faoliyatini litsenziyalash tartibi to‘g‘risidagi nizomga kiritilgan o‘zgartirish va qo‘shimchalar davlat ro‘yxatidan o‘tkazildi. Yangi hujjat mamlakatning kripto-bozorida shaffoflikni ta’minlash hamda jinoiy daromadlarni legallashtirish xavflarining oldini olishga qaratilgan.
Yangi tartibga ko‘ra, jinoiy daromadlarni legallashtirishga va terrorizmni moliyalashtirishga qarshi kurashish bo‘yicha xalqaro hamkorlikda ishtirok etmaydigan (ofshor hududlar) davlatlar rezidentlari va u yerda ro‘yxatdan o‘tgan shaxslarga O‘zbekistondagi kripto-provayderlarni boshqarish taqiqlanadi.
Shuningdek, kompaniyalar ustav kapitalidagi ulushlarni sotish, rahbar, uning o‘rinbosarlari hamda ichki nazorat bo‘limi boshliqlarini almashtirishdan avval litsenziyalovchi organning roziligini olishi shart bo‘ladi. Tegishli arizalar 10 ish kuni ichida bepul ko‘rib chiqiladi.
