Prezident poytaxt iqtisodiyotini 12 foizga o‘stirish vazifasini qo‘ydi. Endilikda Toshkentning har bir tumani o‘z drayver sohasiga ega bo‘ladi: Bektemirda kimyo, Chilonzorda farmatsevtika, Sergelida esa metallurgiya rivojlantiriladi.
Toshkent shahrida iqtisodiy o‘sishni jadallashtirish maqsadida 12 ta tuman muayyan sohalarga ixtisoslashtiriladigan bo‘ldi. Prezident Shavkat Mirziyoyev raisligida o‘tgan yig‘ilishda poytaxt iqtisodiyotini joriy yilda 12 foizga oshirish choralari belgilandi. Rejaga ko‘ra, eksport hajmi 3,6 mlrd dollarga, investitsiyalar miqdori esa 9 mlrd dollarga yetkazilishi shart.
Yangi tartibga ko‘ra, Bektemir tumani kimyo sanoati, Chilonzor tumani farmatsevtika va savdo, Sergeli tumani esa metallurgiya va logistika markaziga aylanadi. Mirzo Ulug‘bek tumanida IT va ilm-fanga, Yashnobodda elektrotexnikaga, Yangihayotda esa avtomobilsozlikka asosiy urg‘u beriladi.
Poytaxt loyihalarini moliyalashtirish uchun 500 mln dollarlik yevrobondlar chiqarish rejalashtirilgan. Tadbirkorlar duch kelayotgan muammolarni bartaraf etish uchun esa maxsus Muvofiqlashtiruvchi kengash tashkil etilmoqda.
