22-iyundan boshlab Vyetnamga kirish uchun parvozdan 72 soat oldin elektron kelish kartasini (PAI) to‘ldirish shart. Uzbekistan Airways yo‘lovchilarni ogohlantirdi.
Elektron kelish kartasi (PAI) onlayn anketa shaklida bo‘lib, uni Vyetnam chegarasini kesib o‘tishdan kamida 72 soat oldin to‘ldirish talab etiladi. Ushbu shaklni hukumatning maxsus prearrival.immigration.gov.vn portali orqali to‘ldirish mumkin (saytda rus tili versiyasi mavjud).
Tizimga shaxsiy ma’lumotlar, viza va safar tafsilotlari kiritilgach, maxsus QR-kod shakllanadi. Yo‘lovchilar ushbu kodni telefonga saqlab olishlari yoki pasport nazoratida ko‘rsatish uchun qog‘ozga chop etishlari kerak.
“O‘zbekiston havo yo‘llari” (Uzbekistan Airways) aviakompaniyasi ham o‘z yo‘lovchilarini ushbu yangi tartib haqida ogohlantirdi. Milliy aviatashuvchi ma’lumotlariga ko‘ra, yangi talab 23-iyundagi HY561 reysidan boshlab barcha yo‘lovchilarga nisbatan qo‘llaniladi.
Mazkur raqamli deklaratsiyaning joriy etilishi Vyetnam aeroportlaridagi immigratsiya nazorati hududida navbatlarni kamaytirishga hamda chegaradan tez va qulay o‘tishga xizmat qiladi.
Izohlar
Hozircha izohlar yo‘q