Veolia Energy Tashkent kompaniyasi isitish mavsumiga tayyorgarlik doirasida 7-sentabrdan e’tiboran Mirzo Ulug‘bek, Shayxontohur va Yashnobod tumanlarining ayrim hududlarida issiq suv ta’minotini vaqtincha o‘chiradi.
Rejali o‘chirishlar 7-sentabrdan e’tiboran boshlanadi va har bir hudud bo‘yicha belgilangan grafik asosida amalga oshiriladi.
Mirzo Ulug‘bek tumanida issiq suv ta’minotidagi uzilishlar eng uzoq — 7-sentabrdan 11-sentabrga qadar davom etadi. Cheklovlar «Uyg‘onish» mahallasi, TTZ-2 massividagi 29, 30, 31, 32, 37, 38a, 38b, 44 va 12-sonli ko‘p qavatli uylarga hamda ushbu hududda joylashgan 512 va 80-sonli maktabgacha ta’lim tashkilotlariga daxldor bo‘ladi.
Shayxontohur va Yashnobod tumanlarida esa profilaktika ishlari 7-sentabrdan 9-sentabrga qadar uch kun davomida o‘tkazilishi rejalashtirilgan. Shayxontohur tumanining «Samarqand darvoza» mahallasi, Uchlola ko‘chasidagi 1-uyda hamda Yashnobod tumanining «Movarounnahr» mahallasi, Nukus ko‘chasi va Kichik halqa yo‘li yoqasidagi 2, 2/1, 2/2, 4, 4/1, 6, 6/1, 6/2 va 8-sonli uylarda issiq suv uziladi.
Kompaniya vakillari keltirilgan noqulayliklar uchun shahar aholisidan uzr so‘rab, issiq suv ta’minoti profilaktika tadbirlari to‘liq yakunlangach va quvurlar bosim ostida tekshirilgandan so‘ng bosqichma-bosqich qayta tiklanishini ma’lum qildi.
Izohlar
Hozircha izohlar yo‘q