Davlat xavfsizlik xizmati Samarqand viloyatida yirik korrupsion holatni fosh etdi. Urgut tumani prokurori o‘rinbosari tadbirkorga gaz bo‘yicha yetkazilgan 2,8 mlrd so‘mlik zararni kamaytirib berish va yengil jazo tayinlatish evaziga pora olganlikda gumonlanmoqda.
Samarqand viloyatining Urgut tumani prokurori o‘rinbosariga nisbatan yirik miqdorda pora olganlik va talab qilganlik ayblovi bilan jinoyat ishi qo‘zg‘atildi. Bu haqda Davlat xavfsizlik xizmati (DXX) xabar berdi.
Tezkor ma’lumotlarga ko‘ra, mazkur mansabdor shaxs muqaddam Past Darg‘om tumani prokuraturasida ishlagan davrida o‘z xizmat mavqeyidan foydalangan. U mahalliy MCHJlardan birining tabiiy gazdan noqonuniy foydalanishi oqibatida davlatga yetkazilgan 2 mlrd 887 mln so‘mlik zararni hujjatlarda 805,9 mln so‘mgacha kamaytirib bergan. Buning evaziga vositachilar orqali 6,5 ming AQSh dollari va 35 mln so‘m pora olgan.
Shundan so‘ng u Jinoyat kodeksining 169-moddasi (o‘g‘rilik) bilan ochilgan jinoyat ishi doirasida zarar miqdorini yana 150-200 mln so‘mgacha pasaytirib berishni hamda suddagi tanishlari orqali yengil jazo tayinlatishni va’da qilgan. Bu „xizmati“ uchun MCHJ rahbaridan yana 15 ming AQSh dollari talab qilgan vaqtda ashyoviy dalillar bilan protsessual tartibda ushlangan.
Ehtiyot chorasi: Hozirda prokuror o‘rinbosariga nisbatan jinoyat ishi ochilib, qamoqqa olish tarzidagi ehtiyot chorasi qo‘llanilgan. Dastlabki tergov harakatlari DXX tomonidan olib borilmoqda.
Izohlar
Hozircha izohlar yo‘q