Urganchda «VAZ-2107» haydagan 9-sinf o‘quvchisi YPX xodimlarining to‘xtash ishorasiga bo‘ysunmay, qochishga urindi. Avtomobil jarima maydonchasiga joylashtirildi.
Ijtimoiy tarmoqlarda Urganch shahridagi mahalla ko‘chalarida yuqori tezlikda harakatlanib, fuqarolar tinchligini buzgan «VAZ-2107» rusumli avtomobil videosi tarqaldi.
Hodisa joyiga yetib kelgan yo‘l-patrul xizmati inspektorlari haydovchiga to‘xtash ishorasini bergan. Biroq u qonuniy talabga bo‘ysunmasdan, voqea joyidan qochishga uringan. Quvish amaliyotidan so‘ng huquqbuzar ushlangan.
Surishtiruvlar natijasida rulda Urganch tumanidagi 2-sonli umumta’lim maktabining 9-sinf o‘quvchisi, 15 yoshli o‘smir bo‘lgani aniqlandi. Voyaga yetmagan bolaning ota-onasi sodir bo‘lgan holat uchun uzr so‘rab, bu holat takrorlanmasligini bildirishgan.
O‘smirning otasiga nisbatan avtomobilni boshqarish huquqi bo‘lmagan shaxsga topshirgani uchun Ma’lumiy javobgarlik to‘g‘risidagi kodeksning 135-moddasi 2-qismi bilan ma’muriy bayonnoma rasmiylashtirildi. Avtomobil vaqtincha jarima maydonchasiga joylashtirildi.
